अवचित!
अवचित घडणाऱ्या गोष्टी किती छान असतात ना ! बऱ्याच दिवसांनी एखाद्या जुन्या मैत्रिणीचा फोन यावा आणि खूप गप्पा माराव्यात. कोकणात नारळीच्या बागेतून जाताना एकदम समुद्र समोर यावा. एकदम घाणेरड्या रस्त्यावरून तंगडतोड करीत जात असताना निशिगंधाचा सुगंध यावा. ठासून भरलेल्या रेल्वेतून अतिशय वैतागवाणा प्रवास करून स्टेशनवर उतरावं आणि मस्त वारं सुटलेलं असावं किंवा पावसात चिंब भिजत येत असताना रस्त्यात एखादी चहाची टपरी दिसावी आणि गरमागरम कांदाभजी खायला मिळावी. नाहीतर आपणच कधीतरी आणि कधी नव्हे ते 'फार' व्यवस्थित ठेवलेले पैसे काहीतरी तिसरंच हुडकताना आपल्याला मिळावेत...
हे सगळं एकदम आठवायचं कारण लिहीलच नाही... परवा lab मधून येताना इतकी सुंदर चंद्रकोर दिसली, अगदी अवचितच!
